Dil Ma Tenê

BAVÊ MÎR

Dil germ nabe bi tukesî

Dostek nema bi kêfxweşî

Dîlber bû min kir dostbêrî

Nexweşhal im dil ma b’ tenê

Keç baxa îrema Xweda

Ew bû nûre ez bûm wenda

Ronî dabû li van dera

Kesek m’ nedî dil ma b’ tenê

Rabû û rûnişt li min nerî

Şewqa çavan dilêm sotî

Kirme agir û bizotî

Bê ceset mam dil ma b’ tenê

Ey letîfa ji ba Ellah

Safî j’ husna tealallah

Peyda kir l’min sed ah û wah

Naçare mam dil ma b’ tenê

Can ji min çû tev bû canan

Carek te li me nekir ferman

Ne bêhêvî me tu caran

Me can têk çû dil ma b’ tenê

Dilsoz û dildarê te me

Şev û roj bend’warê te me

Ez aşiqê rûyê te me

Ez dinalim dil ma b’ tenê

Sermest e dîlbera horî

Xweda çêkir ji ezberî

Dilêm têk çû bû perî

Mal wêran im dil ma b’ tenê

Bejn û balaya zirav

Ez kirme weke hingav

Ronî nema li ber çav

Çavêm nema dil ma b’ tenê

Rûniştîye li nav baxa

Dor pêçaye tev bi gula

Lêv şêrîn e bi van za’ra

Aqil çû dil ma b’ tenê

Deşt û newal tev bû xalî

Ew meşîya wek curdxezalî

Gerden morî sutûn xirxalî

Canêm nema dil ma b’ tenê