Hayêcan

Sidîq Gorîcan

tebax çû havîn xilas bayê tê payîzî ye

singê însana demê j’valahîyê werimîye

(negrî tu hayêcan xew bike lorîcan

bilezîne mezin be dereng e ronîcan)

bi sêv û hilûyan bi tirî û hirmîyan

bereketa Xwedê ye baxçê malbapîran

(….…….)

l’te heye mamekî şaîr bêwelat û bêpûn e

j’dilê xwe daxdayî ye lêvên wî bi qelûn e

(….…….)

l’te heye mamekî şaîr bejnbala wî bilind e

bûye dengê neçaran l’vê dinyaya dirinde

(….…….)

l’te heye xwûşkekê helbestvan bixem û rûkenî ye

evîna gulnûbiharan j’bo şevên wê ronî ye

(…….….)

l’te heye mamekî mamoste xîreta xwe de şêr e

xweşmêrîya wî tev xas e dûrbûna wî keser e

(….…….)

l’te heye mamekî parêzer b’şexsê xwe narîn e

xizmeta wî ya hesbî bi ramana nûrîn e

 (….…….)

l’te heye mamekî nivîsyar bi navê xwe heyvî ye

bêdengîya leylanî ji bo wî xweşgivî ye

(…….….)

l’te heye bavekî şaîr lorî jê re behane

hundir tejî birîn e digrî xef û xalîyane

(…….….)

kezeba min

pitika min lorînas e fenanî liba gelas e

xwe daye gumbila darê bi çûkan re hevnas e

(tu kezeba min ya kel î hêja yî b’hezaran gelî

heramxwir l’vê dinyê pirr in para te bibe helalî)

pitika min şûlebîn e ji çolê re gulbarîn e

bayê mewcan çi xweş e li hawîrdor germhavîn e

(…………)

pitika min yekane ye di sedef de dûrrdane ye

hêvîya min j’Rebbê jorî rêya te b’xêr rîndane ye

(…………)

pitika min bi qîmet e j’kereme Xwedê nîmet e

mijmijoka tu dimêjî dîyarî ye ji mamê te

(…………)

Tebax 2007, Wan