Navê yarê

Dilşad Mutî

Li navekî ji bo te gerîyam

Lê çi bikim peyda nebû

Li nava baxçên gulan westîyam

Her yekî ji rengê te bû

Her yekî rengê xwe ji te dizî

Çi bi xefî, çi aşkere

Bilbizêk ji nişkave lerizî

Silav da ji bejna te re

Hatin silavê sosin û reyhan

Û ji şerma sor bû sorgul

Di temaşa te de mayî heyran

Işqa gulê berda bilbil

Va ye çend aşiqan terikand yar

Li dor fenerê perwane

YASEMÎNê navek li te kir bar

Rengê xwe jî kir behane

Ji rengê te her yek rengek cuda

Li wê bejn û li wê balê

Ya Reb! Ev tenê neqşeyek Xweda

Li enya biskan sema lê

Biskên çin-çînî li reqs û sema

Herdu kezî ji reşmar in

Dil û kezeb dan ber tîr û rima

Çima ev reng li min har in?

Yar bi vî rengî min neêşîne

Bi awirên tûj û dijwar

Jixwe min di dil de herdem şîn e

Ji te re yar im, ne neyar

                                                 2-15.11.2007/Ulm