Ked bû sed

Raîfê Bêçare

Sal bû deh û bû yanzdeh

Nûbihar bû nod û neh

Bona hejmara seda

Got bîsmîllah l'derî da

Bo Xweda hemd û spas

Ku em bilind bûn evqas

Rihma Xwedê li Xanî

Wî kola bû ev kanî

Kanî kişya gihîşt çem

Çem pêl dide dem bidem

Çem jî dikişe golê

Gol hêşîn dike çolê

Çol û çîya dibin bax

Gul sor dibin dertê cax

Jin çêdikin tirşînê

Bona palê havînê

Dilê pala hêsayî

Ewrê reş çû bû sayî

Em bikin behsa ziman

Xoyê bixin birînan

Bila birin kew bigre

Nêçîrvan jî kew bigre

Kew nede kuştin bira

Wan nexe xurê gura

Bira bibin wek şêra

Biqetînin zincîra

Li gura xin bi tîra

Azad bikin hêsîra

Bilind bikin vî dîwar

Ji bo ku bibe sitar

Şad bibe rihê Xanî

Nemirçiqe ev kanî

Ev zimanê meyê xweş

Li ser kevir bibe neqş

Yanzdehsalî sed salî

Ji hevra bikin alî

Dîwar bû mal bû xanî

Kete hundur kevanî

Malxê çû tevdir anî

Zarok dixwin vî nanî

Piçûk bibin bûk zava

Mala wan bibe ava

Zarê wana zêde bin

Îdî qet hêsîr nebin

Zîmanê xwe rind hîn bin

Nav hewşa xwe da şîn bin

Bibin mêr bibin zilam

Xelqê ra nebin xulam

Jibîr nekin kalê xwe

Qedir bidin malê xwe

Xêncî Xwedayê mezin

Ber tu kesî nelerzin

Beredayî negerin

Lez bikin pêşda herin

Merivê li dinê ne

Da bizanbin hûn kêne

Bo dunya bo axretê

Bigrin bendê xîretê

Zarû xort û keç û kal

Bi hevra bibin heval

Nemînin xang nebin kal 

Ber xelqê nebin evdal

Gava ku Xweda yar be

Hizkî alem neyar be

Hûn namînin Bêçare

Allah dîde we çare