Ji Nûbiharê bi silavên germ

Merheba ji we re gelî xwendevanên hêja.

Bi jimareke nû ve vaye dîsa em bi we re nin. Birastî êdî em wisa hînî qada weşangerîyê bûne, em nema hewceyî pê dibînin ku jimara kovarê bijimêrin. Ji berê de jî, amanca ku ji bo weşandin û berdewamkirinê me danîbû pêş xwe me nav lê nekiribû; heta Xwedê derfet bidaya me, meyê weşana xwe berdewam bikiraya. Îcar vaye em gihîştin vê jimarê.

Di hundir vê pêvajoyê de gelek tişt hatin guhertin. Rêya ku dunya pê de dimeşe gelek qonax guhert.

Kovara Nûbiharê serê payizekê dest pêkiribû, bi vê jimarê re payiza pazdehem buhart. Hêvîya me ew e ku gelek jimarê bi naverokên tije û mijarên xweştir wanî berdewam be.

Salên pêşî me tengasîya tijekirina rûperan dikşand, lê îro gelek nivîsar, hîkaye, şi’r tên nivîsandin û digihêjin kovarê. Ev bextîyarî û kêfxweşîyek e. Lê em hêvî dikin ku jimara wan pirtir bibin. Çunkî zêdebûna tiştê baş timî kêm e.

***

Qada serbestîyê, bi bereket e û şahî û dilxweşîya hemî mirovên wê qadê ye.

Li ser vê axê mirov û gelên ku bi hev re dijîyîn, heryekê ji alîkî ve milê xwe dane bin barê jîyanê. Ku tebatîya wan ji hev re tunebe, ji hev re ne dilxweş bin, ji hev re ne çavbar bin, barê ku didin ser milê xwe, hilgirtina wî girantir û zortir dibe. Yekî ku çavê xwe ji yekî din re bigire û wî nebîne, wî kesî pêşî li xwe kirîye tarî. Eger em bidin pey hiş û rastîyê, heqîyê û edalet û biratîyê ku em ji xwe re bikin dustûr, herkes ewê ji jîyana xwe zewqê bistîne. Xwestina heq, bi rêya heq, bi tiştên heq gerek bibe dustûra me. Kîjan çaxa ku mirovan bi vê dustûrê tevgerî kirine, xêr jê dîtine û kîjan cara jê gerîyane, gindirîne binê çahlan û di nava pirsgirêk û sergêjîyan de nalîyane. Xurtîya ku mirov li mirov dike, nexweşî jê çêdibe.

***

Ji pirtûkxane û belavkerên kovarê re.

Birastî di mesela firotin û li me vegera buhayê kovarên firotî de, mixabin hê jî em zehmetîyê dikşînin. Tevî ku em sipasdarê we ne, ji kerema xwe di vê meselê de hessas bin û kêm zêde çiqas be jî kovarên ku hatine firotin, buhayê wan bi zûyî bişînin û heta ji destê we tê, jimara firotina kovarê zêdetir bikin.

Heta jimareke din bimînin di xweşîyê de.

Ali Karadeniz