Şi’ra 3.

Hezkirina te

Omer Dilsoz

Gêjgerînk e hezkirina te

Her ger li destpêka xwe vedigere

Her veger di vegera xwe de pûç dibe

Gotin sêwî

Nêrîn bêwate

Dil ji bendemanîyan diweste

Gêjevank e hezkirina te

Di tarîgewrika xeman de sersem

Di berbanga hêvîyan de xwerû xem

Ne mirov jê dibe

Ne jî pê dikare

Tenê bi têhna wê mest dibe

Daralînek e hezkirina te

Bi seranser dipêçe ruhê min

Diguvêşe hemû rehên bedena min

Tayê dixe gîyanê min

Êxsîr digire hemû jîyana min

Dibe serokanîya hemû xewn û xeyalên min

Revaneyek e hezkirina te

Te direvînim ji hizrên xwe

Te didizim ji dilê xwe

Te vedişêrim ji çavên xwe

Di herzêla ruhê xwe de dinixêvim te

Te dikim sertaca dilê xwe 

2006-04-08