‘Eşq ne karê nazik û nermokan e1

Mewlana Celaleddînê Romî

ji farisî: Hayrullah Acar

Aqil, bendê rêwîyan e ey kurêm.

Bendê bişkîn, rê 'eyan e ey kurêm.

'Aqil bend e, dil da'f û can perde ye.

Rê'j van gişan, nexwuyan e ey kurêm.

Lew tu'j 'eql û can û dil dest berdî jî,

Rastîya te jî guman e ey kurêm.

Mêr, ku heş ji ser neçe ew ne mêr e.

'Eşqa bêderd, bes leylan2 e ey kurêm.

Sînga xwe bik nîşan, li hemberî dost.

Vay, tîra wê di kevane ey kurêm.

Sînga ku ji tîra wê birîndar be,

Li pêşanî sed nîşan e ey kurêm.

'Eşq, ne karê nazik û nermokan e.

'Eşq, bes karê mêrxasan e ey kurêm.

Her kî ku xulamê 'aşiqan be,

Xusrew û sahîbqiran3  e ey kurêm.

'Eşqê'j kesî mepirs, ji 'eşqê bipirs.

'Eşq, 'ewrê dûrr-reşan e ey kurêm.

Ew, bi tercumanya min mihtac nîye.

'Eşq bi xweber tercuman e ey kurêm.

Ger tû biçî ezmanê, qata heftan,

'Eşq, çi xweşik nerdewan e ey kurêm!

Her devera ku karwanek bi rê kev,

'Eşq, qibleya wî karwan e ey kurêm.

Heta b'eşqê, wê te ne xapandibe,

J’te her dûr e ew cîhane  ey kurêm.

Raweste û dev bigre mîna sedef.

K'ev ziman dijminê can e ey kurêm.

Şemsê Tebrîzî hat can pê şadiman.

Lewra'b Şems re kir qiran e  ey kurêm.

Têbînî

1 Mewlana Celaleddîn-i Rumî, Kullîyat-i Diwan-i Şems, (Neşr-i Bedîuzzaman Fruzanfer), Întîşarat-i Behzad, c., III/1097, Tehran, 1329.

2 Serab.

3 Bextîyar, kamran, kesê ku di wextê başî  û geşbûna stêrka xwe de hatibe dinê; padîşahê bi hêz û serbilind.